(تابع) خطاب الرئيس جمال عبد الناصر بمناسبة العيد الخامس عشر لثورة 23 يوليه

         وأمامكم وعلى مسمع من شعبنا كله ومن أمتنا العربية أنا عارف إن فيه أسئلة في نفوسكم، كل واحد منكم جاي يسمع الإجابة عليها في البيوت في كل مكان عايز يعرف وعايزني أقول له من أين نبدأ؟ بقول لكم بصراحة وبوضوح ليس هناك طريق مختصر أو قصير إلى ما نريد.. أيضاً ليس هناك طريق واحد لا بديل له نصل به إلى الهدف. الطريق طويل وشاق كذلك فإن هناك عدة طرق لابد أن نسير عليها في نفس الوقت مهما كانت العوائق والموانع والصعاب.. إن النكسة التي واجهتنا كانت أكبر مما توقعنا ومن ذلك فإننا لا نستطيع أن نقفز بغير تدبير كافي إلى أول طريق يقابلنا وإنما لابد أن ندرك أنه من الضروري علينا أن نعيد البناء الشعبي والعسكري لقوى الوطن المصري.

         كذلك فإن العدو الذي واجهناه بما وراءه وما أمامه لم يكن إسرائيل وحدها.

         من ذلك نقول إن أمامنا عدة طرق لابد أن نسير عليها.في نفس الوقت فيه طرق عربية وطرق سياسية واقتصادية وطرق دولية سياسية ودعائية وعسكرية.

         طرق النضال في هذا المجال كبيرة جداً وإحنا قدامنا طريق من اثنين الواحد يحسبهم، يا إما نستسلم بلا قيد ولا شرط، يا إما نناضل. طبيعة شعبنا، طبيعتنا ونظامنا اللي إحنا معروفين بها في العالم طبعاً حايلزمنا طريق النضال. وأنا لما بأقول إن إحنا قدامنا طريقين، الحقيقة إحنا قدامنا طريق واحد لأن أنا عارف لكن هو موضوع تفسير موضوعي، قدامنا طريقين، بنستسلم أو بنناضل، ولكن بنحطها موضوعية. الحقيقة هما مش حلين هم حل واحد إحنا ما استسلمناش وناضلنا طويلاً، حتى أيام الاحتلال الإنجليزي ناضلنا، وأيام الاحتلال العثماني ناضلنا، وطول تاريخنا ناضلنا. إذن حل الاستسلام ده بنشطبه ويبقى قدامنا حل واحد هو حل النضال. معنى النضال في هذه المرحلة إنه نضال حقيقي نضال قاسي نضال شاق، ولكنه نضال في سبيل مبادئنا وفي سبيل أهدافنا وفي سبيل حريتنا وفي سبيل أرضنا وبلدنا وفي سبيل الثورة الاجتماعية اللي عملناها وفي سبيل الوطن العربي كله.

         هذا النضال له طرق متعددة زي ما قلت لكم. هناك نضال سياسي. إحنا ما بنقفلش باب السياسة أبداً ولا باب الاتصالات السياسية أبداً، مطلقاً، حتى الدكتور فوزي لما سافر أمريكا وراح نيويورك الأمم المتحدة قلت له ما عنديش مانع انك تقابل الأمريكان، وهو أيضاً بهذا قابل وزير الخارجية الأمريكي مرتين. نضال بالعمل السياسي. وهناك نضال اقتصادي، هم قالوا دلوقت إن قنال السويس مقفولة بنخسر في قنال السويس كل شهر 10 مليون جنيه تقريباً، يعني بنخسر في السنة بنفقد في السنة 110 مليون جنيه بالعملة الصعبة. بيقولوا النهاردة أعداءنا إن إحنا كمان خمس أشهر أو ست أشهر بهذا الشكل مش حنلاقي فلوس نشتري بها قمح وحيجوع الشعب المصري. إحنا بنقول إن إحنا حا ناضل نضال اقتصادي، معنى إيه نناضل نضال اقتصادي، يعني حنجيب القمح ومش حنجوع وحنستغنى عن حاجات أخرى قد تكون أقل ضرورة من القمح، وبدي أقول لكم قبل سنة 56 الـ110 مليون جنيه دول إحنا ماكناش بناخدهم كانوا بياخدوهم الإنجليز

<11>