(تابع) خطاب الرئيس جمال عبد الناصر بمناسبة العيد الخامس عشر لثورة 23 يوليه

والفرنسيين شركة قنال السويس. إحنا كنا بناخد مليون جنيه بس قبل تأميم القنال ولكن مفروض كان السنة دي ناخد 110 مليون جنيه. معنى هذا، معنى النضال الاقتصادي إن إحنا حنقوم ببعض التضحيات الاقتصادية، إحنا مش أول بلد تعمل كده. وإنجلترا في أيام الحرب كانوا بيدوا الفرد الواحد بيضة في الأسبوع، بيضة واحدة، كلنا لو نفتكر أيام الحرب العالمية الثانية نفتكر إزاي الإنجليز ناضلوا بعد هزيمتهم في دنكرك، الحرب مش معركة واحدة وتسليم، ولكن نضال أكبر من كده. اللي بيستطيع أن يثبت ويصمد ويقاوم يمكن له أن ينتصر. إحنا خضنا معارك عنيفة وقاسية مش دي أول معركة بنخوضها. المعارك العنيفة اللي إحنا خضناها لم تؤثر على تصميم الشعب المصري في الدفاع عن حريته، ما استسلمش.

         النضال السياسي طريق، النضال الاقتصادي طريق طويل حتى لا نحقق أهداف الاستعمار، والنضال العسكري طريق آخر. إعادة بناء قواتنا المسلحة لتكون قوات قادرة، إقامة المقاومة الشعبية وتعبئة شعبية في كل مكان علشان نقاوم العدوان من قرية لقرية وندافع عن حرية بلدنا، بنقرأ كل يوم عن شعب فيتنام وإزاي شعب فيتنام المسلح بالأسلحة الصغيرة والمقاومة للدبابات والطائرات، ما عندهمش دبابات ولا طائرات بيعملوا إيه في الأمريكان بيسببوا لهم خسائر كبيرة. إحنا مش أقل من شعب فيتنام وإحنا شعب مناضل دايماً. والسويس حصلت عليها غارات جوية أول يوم، طبعاً الناس ذعرت من الغارات الجوية، ولكن بقول لكم ثاني يوم كانوا خدوا على الغارات وثالث يوم ورابع يوم وخامس يوم ده موضوع معروف بالنسبة للعسكريين إن بيسموه ده الشعب يتطعم، تطعيم، تطعيم الشعب بالنسبة للقتال. الواحد لما يسمع صوت الرصاصة لأول مرة بينخض بعد كده يمكن يسمع صوت المدفع الرشاش ما ينتبهش. وأقول النضال العسكري مش بس بالنسبة للقوات المسلحة ولكن بالنسبة للشعب كله.

         والمقاومة الشعبية يجب أن تكون في كل مكان.

         بعدين أنا سمعت بيقولوا المقاومة الشعبية راحوا ومدهمش أسلحة، ومش فاهم إيه وحاجات بهذا الشكل. معلش مفيش داعي نكون نقادين لكل حاجة وعايزين الكمال، إحنا محناش أمريكا.

         عايزين مقاومة كشعبية ناس يبقى معاها أسلحة وناس بيبقى معاها سكاكين وناس بيبقى معاها نبابيت وناس بيبقى معاها عصيان وناس بيبقى معاها أسلحة أخرى. دي المقاومة الشعبية على أد قدرتنا وعلى أد استطاعتنا. وعلى هذا نستطيع فعلاً إن إحنا نأخذ عدد كبير للمقاومة الشعبية.

         وأرجو من الشبان إن مايخبش ظنهم لما يجدوا إن مفيش أسلحة متوفرة مفيش أسلحة لكل الناس، بالتدريج بنوفر لهم كلهم أسلحة. ولكن عدد قليل من الأسلحة بينفع لتدريب عدد كبير من الناس.

<12>