(تابع) خطاب الرئيس جمال عبد الناصر بمناسبة العيد الخامس عشر لثورة 23 يوليه

آخر نكتة ويحكي، هو كده، ما إحنا كده وهمه عارفينه طبعاً وممكن يستخدمونا بأن تقال بعض النكت، الحقيقة التي تؤثر على كرامتنا، كرامتنا كشعب له طلائع قاتلت وماتت، في ناس ماتت، مش إحنا أول ناس خسروا معركة، الأمريكان انضربوا في بيرل هاربور وهربوا - الإنجليز مشيوا من دنكرك عريانين كانوا بيطلعوا بقوارب الصيد، وفرنسا وقعت في 10 أيام، اللي واقفين ضدنا النهاردة، هولندا راحت في يوم وبلجيكا راحت في يوم، أوروبا الغربية كلها راحت، وكلنا نذكر الخطب اللي اتقالت خطبة تشرشل بعد دنكرك وقال إن إحنا قوقعة فقدت الغلاف اللي بيحميها، لازم نتلم شوية لغاية ما يطلع لها غلاف جديد ويتربى الغلاف الجديد، وإزاي استحملوا معركة بريطانيا وضرب لندن بالقنابل والأكل ماكانش بييجي لهم إلى آخر هذه الحكايات، ولكنهم ناضلوا وانتصروا، كان بيطلع لهم كل يوم واحد اسمه هاوهو كان إنجليزي ويقول لهم انضربتم واتبهدلتوا وكسروا إنجلترا بالغارات الجوية، وكسروا لندن وكسروا كندا وكان يسخر منهم مانفعش، إحنا ما كان علينا 11 محطة إذاعة سرية ومحطات إذاعة برضه في سنة 1956 طيب إحنا نقول على الغرب ليه، بتهاجمنا وباستمرار علشان تيأسنا في عيشتنا وتيأسنا في حياتنا، لم نيأس في عيشتنا ولم نيأس في حياتنا ولم نسلم، وكانت إذاعة صوت بريطانيا اللي بدأت في سنة 1956 بتقول حنضرب كذا وحنضرب كذا، وكانت الناس في كل مكان بتقول حنحارب إحنا برضه، وبعدين وقعنا تحت الضغط الاقتصادي ووضعت أموالنا تحت التجميد في سنة 1956 وما كانش عندنا عملة صعبة وقعدنا واستطعنا إن إحنا ننجح في نضالنا الاقتصادي ونضالنا العسكري ونضالنا السياسي- العدو النهاردة لم يحقق أهدافه، هدفه مش هوه الأرض، مش هوه سيناء، أبداً، ولا الضفة الغربية ولا مرتفعات سوريا، هدفه هوه انتم بأن نيأس، يسقط آمالنا، تسقط المبادئ التي آمنا بها، تسقط ثورتنا الاجتماعية اللي حاولوا أن يسقطوها بجميع الوسائل، النهاردة أعدائنا الأمريكان بيقولوا إيه؟ أهو وصلنا لغاية كده ونسيبهم بقه 6 أشهر وحيقعوا همه لوحدهم، الشرخ موجود وحيقعوا همه لوحدهم، الشرخ موجود من ناحية اليأس حيقعوا، والأمة العربية كلها حتيأس، ومتصورين إن ده ممكن يحصل، متصورين إن إحنا ممكن نيأس، متصورين إن إحنا ممكن نتشكك في أهدافنا، ونشكك في كل شئ.

          كل واحد ما يقابل واحد يقول له سمعت.

          كل ده الحقيقة يفرض علينا واجبات كثيرة، يفرض على كل فرد من أبناء الأمة العربية كلها، مش بس في مصر، في كل بلد عربي أن يكون يقظ وحذر من أساليب الاستعمار والصهيونية اللي عايزانا نيأس ونكفر بالقيم بتاعتنا. إحنا مش حنيأس ولا نكفر بالقيم بتاعتنا ولا نكفر بالأهداف بتاعتنا وحاننجح امته؟ إذا كل فرد فعلاً كل فرد آلى على نفسه أن يعمل ضد أهداف العدو ما تجيش تقول لي التنظيمات السياسية هي اللي تعمل، أنا بأقول لا كل واحد عليه مسؤولية، كل فرد عربي في كل وطن عربي عليه مسؤولية، ما يلقيش المسؤولية على غيره، كل واحد لو قام بمسئوليته نهزم أهداف الاستعمار والصهيونية ونستطيع أن نحقق نتائج نضالنا الشعبي ونضالنا السياسي ونضالنا العسكري ونحرر الأرض المحتلة. أما إذا كان الاستعمار حايخلي كل فرد يتشكك ويقدر يؤثر على كل فرد ولو 50% بيكون الاستعمار نجح 50%. كل فرد عليه مسؤولية وكل فرد

<16>