(تابع) خطاب الرئيس جمال عبدالناصر، في جامعة القاهرة في نطاق لقاءاته مع قوى الشعب العاملة

         العمل السياسي عملية حسابية وأيضاً عملية معقدة، بعد إعلان بيان 30 مارس وإعلانه للاستفتاء الشعبي العام ناس كتير قالوا ليه الاستفتاء ؟ يمكن مش كتير، وناس قالوا طب ليه الاستفتاء على الجزء الأول من البيان.. الجزء الخاص باستمرار المعركة.. والجزء الخاص بتحرير الأرض، هذا موضوع عليه خلاف حتى يحصل استفتاء عليه، اعتقد المثقفين يستطيعون فَهْم ما كتب كذلك فهم الحكمة في النص في البيان على الاستفتاء المثقفين يعرفون أن المعركة معركة التحرير ليست مسألة سهلة كل واحد بيفكر تفكير علمي يعرف أن المعركة طويلة المعركة مريرة محنش هنقدر نطلع اليهود في يوم وليلة مش هنقدر نحرر الأرض اللي احتلت بسرعة .. انفعالا يمكن فيه واحد فينا بيفكر كل واحد بينام بالليل بيحلم إزاي.. إزاي اليهود موجودين على بعد 100 كيلو من القاهرة.. طبعا دخلنا معركة يوم 5 يونيه وخلال سنين بنينا القوات المسلحة وحصلنا على أسلحة وفى أربع أيام كل شئ ضاع وخسرنا المعركة العسكرية وفقدنا جزء كبير أكثر من 80% من معداتنا. وابتدينا بعد كده أن إحنا نبني قواتنا المسلحة ونعرف إيه العيوب اللي كانت موجودة ونأخذ الدروس ونتسلح وندرب ونبني وحدات جديدة ونستعد لتحرير الأرض. مش هنقدر نبني وحدات جديدة في يوم وليلة مش هنقدر نتدرب على الأسلحة اللي حصلنا عليها في يوم وليلة مش هنقدر نبني وحدات جديدة ونطلع ضباط جداد ونجهز طيارين جداد في يوم وليلة.

         الحقيقة حاجة برضة بدى أقولها لكم الاتحاد السوفيتي ساعدنا إلى أقصي مدى، إحنا عوضنا الأسلحة اللي فقدناها وقررنا إنشاء وحدات جديدة علشان نستطيع أن نقابل قوة إسرائيل بحيث أن إسرائيل متكنش متفوقة علينا في البر أو في الجو، وفي نفس الوقت معندناش فلوس نشترى بيها السلاح وحتى يمكن لو كان عندنا فلوس الغرب مكنش هيدينا في سنة 55 كان عندنا فلوس ومرضيش يدينا وبعدين الاتحاد السوفيتي ادانا هذه الأسلحة ومدفعناش فلوسها ولا مليم جزء أخذناه في الأول مساهمة من الاتحاد السوفيتي بدون مقابل وبعتوا لنا طيارات بدون ثمن ودبابات وأسلحة وده اللي خلانا يمكن قدرنا نطمئن زي ما قلت لكم فيه فترات مرت على الواحد وهو حاسس بالكابوس إسرائيل يمكن تعدي قنال السويس كان ممكن في بعض الأيام ولكن فاتت هذه الأيام. رغم النكسة اللي حصلت.. والأيام الصعبة اللي مرت بينا إحنا النهاردة في وضع أحسن أما هندخل المعركة هتكون هذه المعركة معركة فاصلة.

         أما أتكلم إلى المثقفين همة اللي يقدروا يعرفوا صعوبة العملية لأنهم حيحسبوا حساب علمي. بيقدروا يعرفوا أنها معركة طويلة، معركة مريرة. وفيه بلاد قبلنا مارضيتش بالهزيمة وصممت على النصر وقدرت تحقق تصميمها. لما أتكلم للمثقفين لازم يعرفوا أن هذه المعركة فيها تضحيات كبيرة ولها تكاليف كثيرة.

         إذن بيفهموا ليه بيان 30 مارس نص على الاستفتاء. نتيجة الاستفتاء سوف تعطيني مقياساً للتصميم الشعبي. هل نبقي في العمل السياسي وحده؟ والعمل السياسي نتيجته محدودة. العمل السياسي وجزء من أرضنا محتله، لا يمكن أن يعطينا النتائج اللي كل واحد فينا بيفكر فيها. لإن إسرائيل وهي تحتل هذه الأراضي العربية لابد لها أن تفرض شروطها وشروطها هي شروط المنتصر. الاستفتاء حايبين هل إحنا مستعدين إن

<7>