(تابع) خطاب الرئيس جمال عبدالناصر، بمناسبة الذكرى التاسعة لقيام الوحدة بين مصر وسوريا

بيقولوا إن ضابط يمني.. ضابط شرطة هرب من تعز وراح عدن وعمل مؤتمر صحفي.. بيقول إيه بيقول دول طلبوني في صنعاء فأنا قلت دا المصريين طلبني علشان يقبضوا عليه.. ده كلام طبعاً المؤتمر الصحفي راديو لندن بيذيع والمستر ويلسون أهه بيدفع كل يوم على الصبح قرشين لواحد يأجره علشان يعمل له مؤتمر صحفي في عدن ويقولوا المصريين مستعمرين.. حيضحكوا على مين.. حيضحكوا على الشعب العربي المصريين راحوا اليمن علشان يضربوا الاستعمار والقوى الرجعية والإنجليز طبعاً محروقين علشان حيسيبوا عدن وحيسيبوا الجنوب العربي وحيسيبوا الخليج ومش هيقدروا يقعدوا في العالم العربي وإحنا وراهم لغاية منضفه منهم.. أهداف (إحنا نسينا وإلا إيه) ضحك..

          أهداف الاستعمار معروفة وبالتالي أعداؤه في المنطقة معروفين وحبايبه معروفين، نفتح الراديو ينزل شتيمة فينا وبعدين يمجد في العاهل السعودي والعاهل الأردني ليه العاهل السعودي والأردني همه الحبايب وهما اللي بيدافعوا عنهم لأن أهداف الاستعمار معروفة وعايزين يضربوا القوى الوطنية والقوى الثورية، وحبايبهم معروفين الملك حسين والملك فيصل، وطبعاً أي واحد يخرج عن ثورة اليمن يبقى حبيب قوي للإنجليز.. النعمان بقى حبيبهم قوي كان متصل بيهم.. واللي انشقوا على الجمهوريين بقوا حبايب ويبسطوهم وبيروحوا للملك بيكرمهم ويديهم فلوس ويبسطهم ويسافروا، وبيسافروا على بيروت.. السعوديين يمولوهم ويكرموهم أي واحد يخرج على الجمهورية حبيب قوي لقوى الاستعمار وقوى الرجعية وأهداف إسرائيل معروفة وبالتالي أعداءها في المنطقة معروفين.. أد إيه إسرائيل بتتكلم على سوريا وبتناوش سوريا وتحتك بسوريا وتهاجم سوريا وتنشر الإشاعات عن سوريا ثم تهاجم مصر ويقولوا إن كان فيه مظاهرات في "بلطيم" باين وألا إيه علما بأن "بلطيم" محدش بيروحها في الشتا.

          ومش قادرين يقولوا القاهرة لأن الناس يكشفوهم لكن أصلاً اللي بيقول ده الملك حسين.. الملك حسين فهو بقى ملك فاجر عاهر الأردن زي ما بيقولوا عليه الإنجليز.. واخد الصنعة عن جدو.. في سنة 48.. جدو الله يرحمه كان بيتفاوض مع اليهود كانت تروح له جولدا مائير.. ويتفاوض مع موشي ديان.. أهو.. وإحنا الجيش المصري كنا في معركة مع اليهود وهو هات مفاوضة مع اليهود وبعدين مش يهاجم ويفتح جبهة ثانية، لا اتفق معاهم إنه ينسحب ويسيب لهم اللد والرملة.

          الملك حسين يعني بالوراثة وبالتبعية ماشي في نفس الطريق. أما يقفوا اليهود وإسرائيل ويقولوا إن أي حاجة تمس الملك حسين.. أو حكم نظام الحكم القائم في الأردن.. إن إسرائيل تتدخل وبتهاجم الضفة الغربية وتستولي على الضفة الغربية.. أيام السموع والمظاهرات اللي حصلت في الضفة الغربية حصل كلام بهذا الشكل.. إحنا بعتنا للسوريين وقلنا لهم إن إحنا قررنا إن أي هجوم على الضفة الغربية في الأردن معناه بدء المعركة بيننا وبين إسرائيل فما هو موقف سوريا؟

<15>