(تابع) خطاب الرئيس جمال عبدالناصر، بمناسبة الذكرى التاسعة لقيام الوحدة بين مصر وسوريا

لازم نزود فرص الشغل وفرص العمل - إذن أي جنيه عندي أو أي مبلغ عندي لازم أستثمره يا في الزراعة يا في الصناعة.

          علشان نزود الإنتاج وأشغل الناس نيجي ساعات بقى نتزنق ومانلقيش فلوس مثلاً نجيب بها حاجة. ما هو أنا لو ما عملتش ده لو ما صلحتش الأرض لو ما بنتش المصانع ما هو حا تبقى الفلوس عندي واللي عايز بضايع استهلاكية أجيب له وأهي نازلة في السوق وأطلع اشتري من بره. طيب وبعدين بيتخرجوا الأولاد من الجامعة ما بيلقوش ما بيشتغلوش اللي بيتخرجوا من مراكز التدريب ما بيشتغلوش واللي بيتولدوا كل سنة ما يشتغلوش وعندنا النهاردة 40 أو 45% من سكان البلد أقل من 15 سنة يعني السنين اللي جاية كل دول عايزين يشتغلوا إذا كنا بنشغل السنة دي 100.000 أو 150.000 يبقى عايزين بعد كده نشغل 300.000 طيب حانشغلهم فين إذا ما كناش نجري بكل ما في إمكاننا في الإنتاج وفي الصناعة وفي الزراعة على طول أول ما يحط كل العملة الصعبة اللي عندي وباستلف مش بس بأحط اللي عندي وأنا بحط قدرتي وبعدين بأطلع أستلف أروح للدول الصديقة أستلف وأحاول من الدول الغربية أستلف علشان أعمل إنتاج وأعمل صناعة وزراعة أكبر من قدرتي وأسرع في التنمية، بعدين طبعاً بتيجي ساعات علينا حاجات ما نقدرش نشتريها ويشهروا بينا ويقولوا دول كذا وكذا وكذا، ولكن ما أدمناش طريقة يعني نقدر نبطل صناعة ونبطل زراعة أو نبطئ ونريح نفسنا أوي وكل حاجة ممكن نلاقيها في السوق بس ولادنا بيتخرجوا ما بيشتغلوش أو جزء حا يشتغل وجزء ما يشتغلشي وأعتقد أن أي واحد في البلد عايز ولاده يطلعوا من الجامعة يشتغلوا أو مراكز التدريب للعمال يشتغلوا أو من المعاهد العليا يشتغلوا. علشان نحقق هذا الطلب وهذه الرغبة إذن لازم نعبئ كل أموالنا من أجل التنمية من أجل أن نتخذ خطة أكثر من قدرتنا لغاية دلوقتي الادخار 10% من الدخل القومي، 10% من الدخل القومي ما نقدرش ننفذ الخطة عايزين 15% من الدخل القومي 20% من الدخل القومي لأن الفلوس دي هي اللي بنفذ بيها الخطة وما دام عايزين حاجة أكثر من قدرتنا لازم نعبأ جهودنا بنينا السد العالي في أقل من 10 سنوات بنينا الصناعة في أقل من 10 سنوات استصلحنا أرض ونحن الآن نحاول أن نحقق أكثر مما حققناه. عاوزين نبني الصناعة الثقيلة عايزين نزود مساحة ما استصلحناه الأرض اللي استصلحناها عايزين نستزرعها الأرض اللي استزرعناها عايزين نستغلها استغلال اقتصادي كامل. حانبتدي السنة دي إن شاء الله نأخد أول كهرباء من أسوان في الصيف أول الثورة كان عندنا مليار كيلووات ساعة النهاردة عندنا خمسة مليار كيلووات ساعة. السد العالي لوحده حا يدينا عشرة مليار أد اللي كان عندنا أول الثورة عشر مرات كل حاجة بتتعمل من عشر سنين كنا بنحارب علشان السد العالي علشان رفضوا يبنوا لنا السد وأممنا القنال ودخلنا حرب وقالوا منتش حاتعملوا السد العالي وأهو السد العالي قرب يخلص والسنة دي حناخد منه كهرباء.

          لما بنقول بنعمل ده وبنعمل ده وبنعمل ده يبقى معنى ده إيه؟ قطعاً لازم حتكون هناك مشاكل، مشاكل مالية ومشاكل إدارية. وإحنا مابنقفش، مشاكلنا المالية لا تقيد حركتنا ولا توقف تقدمنا وإحنا باستمرار ندبر

<20>