(تابع) خطاب الرئيس جمال عبدالناصر، بمناسبة عيد العمال في شبرا الخيمة

رفضناها قطعوا المعونة أو هيه اسمها معونة- إحنا بندفع 25% من الفلوس اللي هيه دفعناها أو حوالي 25% واخداها السفارة الأمريكية مصاريف، السفارة الأمريكية كلها من ثمن القمح اللي إحنا اشتريناه وداروا اشتروا بيوت في مصر وبنوا مباني منين- هل جابوا دولارات؟ من ثمن القمح اللي إحنا أخذناه- مهياتهم ومصاريفهم كلها من ثمن القمح اللي إحنا أخذناه، إذن بنقول العملية مش معونة إحنا دفعنا فلوس وبتتصرف- السياح الأمريكان فعلاً اللي بييجوا مصر بيأخذوا منهم الدولارات في السفارة الأمريكية ويغيروهم جنيهات مصرية من ثمن القمح اللي إحنا اشتريناه، إذن العملية ما كانتش عملية إحسان والمفروض إن إحنا الفلوس دي خدناها الفلوس دي حندفعها على 30 سنة بفايدة 4%، كنا بندفع بنأخذ قمح وبندفع بالجنيه المصري 25% من القيمة اللي بندفعها بتأخذها السفارة الأمريكية تصرفها- والباقي 75% ممكن نأخذه وكنا سنستخدمه في حاجات ثانية على إن إحنا ندفعه بعد كده، ولكن أما طلبوا الشروط ورفضنا أنا قلت لكم الموضوع ده بالتفصيل، قطعوا- قالوا نقطع المعونة وقطعوها في الوقت اللي كنا بنأخذ قمح منهم بما قيمته 60 مليون جنيه، والسنة اللي فاتت يمكن تعبنا شوية لأن كان علينا نوفر 60 مليون جنيه والسنة دي بنوفر المبلغ وبنشتري دالوقت كل حاجة بفلوسنا- القمح كله بنشتريه كاش بفلوسنا- الذرة بنشتريها كاش بفلوسنا- كل حاجة ما بنأخدش مساعدة من أي دولة في العالم، وإحنا بهذا نعتمد على أنفسنا اعتماد كامل- الضغط الاقتصادي قالوا انهم مش حيدونا قروض ما يدوش- إحنا كنا بأخذ منهم قروض بـ6% و7% وساعات كنا بنأخذ قروض بـ8% وقالوا انهم حايضغطوا علينا اقتصادياً قمت أنا قلت اللي حايضغط علينا اقتصادي حنعرف إزاي نتصرف معاه، وأي بلد حتضغط علينا ضغط اقتصادي ديونها مش حندفعها- طلعوا وعملوا هيصة وقالوا إن عبدالناصر حياكل الفلوس ومش حيدفع الديون وبيعمل كذا، وأنا فعلاً- هوه حيضغط علي طيب ما أنا أضغط عليه، أنا أقدر أضغط عليهم أكثر لأن أنا اللي مستلف منه، أول ما يضغط علي أقوم أنا ماديلوش- عملية لطيفة يعني- فعملية الضغط الاقتصادي دي عملية لا تنفع وإحنا نعتمد على أنفسنا ونبني بلدنا وإحنا نقدر على السنة اللي جاية كده يمكن نكون وفرنا وريحنا نفسنا قوي في موضوع الـ60 مليون جنيه، وبيفضل بعد كده الضغط النفسي والدعاية- برضه يعملوا ضدنا وهمه بيدوا طبعاً الخبرة دعاية في العالم العربي- ويقولوا بقه إن عبدالناصر ضد الإسلام، وإن عبدالناصر ضد الدين، وفيصل يطلع- وفيصل طبعاً بيتكلم على الدين ببقه وقلبه ما فيه أي دين ولا فيه أي حاجة- كلام يعني وتمثيل ويطلقوا للناس ويوزعوا كتب وورق حلو، أنا بأقرأ الكتب دي بييجي ليه نسخ منها وورق جميل وطباعة كويسة جداً وكله شتيمة، والله هذه الأمور ماهياش جديدة علينا- ياما اتشتمنا قبل كده، وياما اتقال علينا قبل كده، وكان علينا محطات إذاعة لا أول لها ولا آخر، تطلع إذاعة طبعاً إذاعة الملك حسين بتشتغل للمخابرات الأمريكية لـ سي آي إيه، لأن الملك حسين نفسه بيشتغل في الـ سي آي إيه- إذا كان الملك حسين نفسه بيشتغل في سي آي إيه يبقى الإذاعة بتاعته بتشتغل في الـ سي آي إيه يطلعوا الإذاعة ويشتموا بقه كلام سافل وكلام وسخ وطبعاً أنا بأقرأ الكلام اللي بتقوله إذاعة الملك حسين وأقول كلام عيال ولا الواحد يعبره بحاجة ويطلعوا زكريا محيي الدين اعتقلوه- وتطلع جريدة في السودان تطلع مانشيت إن زكريا محيي الدين اعتقلوه، حاأرد كل يوم أقول لهم ثاني يوم لا ده صلاح نصر اعتقلوه، ثالث يوم ده حسين الشافعي اعتقلوه - الله -

<17>