(تابع) خطاب الرئيس جمال عبدالناصر، بمناسبة عيد العمال في شبرا الخيمة

         مش معقول طبعاً حاأرد على العيال دول لأن يعني أخرتهم معروفة وأنا وهمه والزمان طويل مش حانسكت- في أيام ما حصل العدوان الإسرائيلي على سوريا طلعت إذاعة العيال في الأردن- إذاعة الملك حسين تقول إيه، إن اتفاقية الدفاع المشترك مع سوريا ما اتنفذتش والملك حسين زعلان بقه وبيعيط هوه وأمه على الاتفاقية إنها ما اتنفذتش جره إيه إنه الحكاية محزنة في الأسرة الهاشمية في عمان إيه الحكاية وقالوا مصر ما قامتش تساعد سوريا الملك حسين هوه وعيلته زعلانين قوي- وأخذوا بقه موضوع الدعاية وإزاي مصر- طيارات من مصر مراحتش في ساعة الطيران السوري- طبعاً معروف إن الطيارات المقاتلة مداها محدود وطياراتنا المقاتلة ما توصلش لحدود سوريا إذا قامت من مصر علشان تروح وترجع معروف إنها ما توصلش لحدود سوريا، أي طيارات مقاتلة يعني ما توصلش لأن مدى الطيارات محدود، فإزاي بتطلع طياراتنا من هنا. أنا بأقول هذا الكلام علشان أنبه الأمة العربية والشعب العربي والشباب العربي لكل شئ ويعرفوا كل شئ- إحنا عملنا اتفاقية دفاع مع سوريا وقلنا إن إحنا مستعدين مستعدين إن إحنا ننفذ هذه الاتفاقية وبنقف مع سوريا وبنقف مع الشعب السوري، الشعب السوري زي الشعب المصري وأي شعب عربي زي الشعب المصري ولا يمكن بأي حال من الأحوال إن إحنا نفرط في هذا. ولكن إذا حصل اشتباك في الجو بين سوريا وإسرائيل ما نقدرش نطلع من مصر نساعد سوريا، الطريقة الوحيدة علشان نساعد سوريا إن تكون لينا طيارات موجودة في سوريا وإحنا من أول ما وقعنا هذه الاتفاقية قلنا للسوريين لإخواننا السوريين إن إحنا على استعداد لأي مساعدة، إذا عزتم طيارات بنديكم- إذا عزتم طيارين بنديكم- أي حاجة مافيش فرق بين سوريا ومصر في هذا الموضوع أبداً وإخواننا السوريين قالوا إن عندهم كفاية، وفي هذا إحنا اطمئنينا- أما سافر الفريق صدقي بعد المعركة الأخيرة كرر نفس الشيء ولا زلنا طبعاً مستعدين لنفس الشيء إن إذا حصل هجوم على سوريا بيطلع الطيارين المصريين مع الطيارين السوريين بيقابلوا أي عدوان جوي على سوريا. ملك الأردن العميل اللي إذاعته قالت هذا الكلام المتعاون مع الاستعمار خدام الاستعمار، والمتعاون مع إسرائيل عمل إيه بقه في هذا الموقف أما حصلت الحوادث بين سوريا وإسرائيل، حصلت معركة جوية فوق الأردن وتصدى الطيران السوري للطيران الإسرائيلي، وتصدت القوات المسلحة السورية للقوات الإسرائيلية، وكانت معركة كبيرة واستطاع السوريين انهم ينزلوا بالإسرائيليين خسائر فادحة اتكلموا عليها بعد كده- وقع 3 طيارات في الأردن- 3 طيارات سورية وقعت في الأردن، عمل إيه الملك حسين- عملوا إيه العيال اللي في الأردن، قطعم الإذاعة- كانت إسرائيل أذاعت إنها أسقطت عدد من الطيارات السورية، وسوريا ما كانتش أذاعت وإسرائيل أما بتنضرب لها طيارات وتقع عندها ما بتقلش عليها أبداً، بتقول ما عندناش ولا طيارة- الملك حسين قطع الإذاعة وأعلن إن عدد من الطيارات السورية وقع في الأردن، ولقوا طيارة وفيه أخبار إن فيه طيارتين سوريتين ثانيتين وانهم طلعوا يدوروا عليهم- بعدين قطعوا الإذاعة تاني، الملك حسين والعيال اللي معاه وقالوا أن لاقوا الطيارتين الثانيتين والطيارين، وبعدين قطعوا الإذاعة ثاني وقالوا إن الطيارين ودوهم المستشفى، وبعدين قطعوا الإذاعة وقالوا إن الحسين راح يزور الطيارين ويشرف عليهم، بقى ده كلام رجالة- ده كلام ده، الكلام ده ممكن حد يقوله- بقى انتم إذا كنتم عرب حقيقي وإذا كنتم بتعملوا من أجل أهداف الأمة العربية تقطعوا الإذاعة وتعلنوا هذا الكلام والا كنتم تتصلوا سراً بإخوانكم السوريين

<18>