(تابع) خطاب الرئيس جمال عبدالناصر، بمناسبة عيد العمال في شبرا الخيمة

الكهرباء مش بس للنور طبعاً، هذه الكهرباء حاتكون للصناعات الجديدة ولازم نعمل صناعات جديدة علشان نستخدم فيها هذه الكهرباء اللي جاية من السد العالي. خلصت الخطة الأولى وقابلتنا طبعاً في الخطة الأولى مشاكل ومصاعب، كانت أول خطة كاملة قابلتنا مشاكل في التنفيذ، وقابلتنا مصاعب وانتهت الخطة الأولى. وبدأنا الخطة الثانية، والحقيقة حينما واجهنا الضغط الاقتصادي حسبنا أن هناك نوايا سيئة متربصة بنا اقتصاديا وقلنا لازم نغير الطريقة اللي عملنا بها الخطة. وتفتكروا إن أنا قلت لكم إن إحنا قررنا نمد خطة الخمس سنين إلى سبع سنين بحيث مانزنقش على نفسنا أكثر من اللازم، ولكن بعد كده قلنا كان مر سنة دلوقت السنة الثانية من الخطة، قلنا مفيش داعي إن إحنا نحسب لآخر السبع سنين لأن الظروف بتتغير، فيه بترول اكتشف فيه دخل حايجي من البترول، في إنتاج بيزيد. وعلى هذا الأساس تملي الخطة اللي كانت موجودة تعمل خطة جديدة. فاتت سنتين من الخطة الأولى اللي هي الخمس سنوات يبقى فاضل ثلاث سنين، نعمل خطة إنجاز عاجلة للثلاث سنين وتكون هذه الخطة هي استعداد وتأهب لانطلاقة أوسع مثلاً. "إنشاء الله" إحنا بلد مهياش غنية بالثروات المعدنية ومهياش غنية بالأراضي الزراعية. إحنا عندنا الأرض الزراعية محدودة وإحنا دلوقت بنعمل جهدنا علشان نزود المليون ونصف فدان اللي حانزودهم بمياه السد العالي. طبعاً دول أيضاً عايزين استثمار وعايزين وقت لغاية ما يدونا عائد اقتصادي لهذا الاستثمار. إذن إحنا الحقيقة رأس مالنا الأساسي وعلشان ننفذ هذه الخطط والكلام اللي إحنا بنقول عليه، هذا الرأسمال هو مقدرة العمل ومقدرة العمل المنظم ومقدرة العمل المسئول ومقدرة العمل الواعي. بالعمل نستطيع فعلاً إن إحنا نحقق الآمال الموجودة قدامنا ونحل كل المشاكل. ولكن بدون العمل مهما حطينا فلوس ما احناش حانقدر أبداً نطلع بنتيجة لهذه الأموال. طبعاً إذا أردنا أن نصلح الأراضي بنستمر وبنجيب الآلات ولكن مش ممكن الأراضي تتصلح إلا بالعمل، العمل المنظم، العمل الواعي، العمل المسئول. وده اللي إحنا بنطلبه من كل مجال من مجالات العمل في البلاد. بهذا نستطيع فعلاً إن إحنا ننفذ خطة الإنجاز اللي هي خطة لثلاث سنوات حاتبدأ من السنة المالية الجارية، تبدأ من شهر يوليه وأول سنة يمكن حايكون الاستثمار فيها بحوالي 400 مليون جنيه، أعتقد أن 400 مليون جنيه مبلغ كبير وأكبر مبلغ بنصل إليه في الاستثمار.

          ولكن إذا أردنا نتيجة لهذه الاستثمارات بالعمل المنظم الواعي العمل المسئول في كل المجالات على مستوى العمال وعلى مستوى الإدارة وعلى مستوى الوزارات وعلى كل المستويات، نستطيع فعلاً إن إحنا نحقق الآمال اللي إحنا عايزنها مفيش طريق قدامنا يوصلنا للآمال اللي إحنا بنطالب بها وأي واحد فيكم يقدر يطالب وأنا حاأجيب له منين علشان أديكو لازم تشتغلوا من إنتاجكم وأقدر أدي الناس اللي عايزة تشتغل حانشغلها في إيه. ده بيطلع عندنا 25 ألف كل سنة من الجامعة زائد عدد كبير بيدخل ضمن نطاق العمال في المصانع. إذا ما عملناش مصانع جديدة مش حانشغل عمال جداد، وإذا ما توسعناش في التنمية وفي الصناعة وفي الزراعة، خريجين الجامعة وجميع الخريجين دول مش حنلاقي لهم عمل. السنة دي داخل التوجيهية 150 ألف، قبل كده كان بيدخل التوجيهية 100 ألف، السنة دي داخل 150 ألف توجيهية يطلعوا، يطلعوا الـ150 ألف بتوع التوجيهية فيه ناس حاتروح مراكز تدريب وفيه ناس حاتروح إلى الجامعات أو إلى

<7>