(تابع) خطاب الرئيس أنور السادات، أمام مجلس الشعب واللجنة المركزية للاتحاد الاشتراكي العربي حول نتائج زيارته إسرائيل
المصدر: "الوثائق الفلسطينية العربية لعام 1977، مؤسسة الدراسات الفلسطينية، بيروت، مج 13، ص 478 - 484"

راديو موسكو. النهارده بينشر راديو موسكو ان فرطت في القضية. ما هو ده اللي بيدي الموشح. ايوه. سمعوا كلمتي في الكنيست، سمعها القادة بس. لان انتم عارفين البرافدا أربع ورقات. لو حبوا يطلعوا خطبتي عايزة تعمل عدد مخصوص فيه مئة ورقة. دي اربع ورقات بقه لها ستين سنة، ومش حتطلع اكثر من اربع ورقات. لكن راديو موسكو: فرط في الحقوق العربية.... ويطلع بقية عمليات التشنج للآخرين. كنت اتمنى ان القادة السوفيات يضعوا امام شعبهم خطابي. يكتبوه ويذيعوه لهم في التليفزيون وبعدين يسألوا رأيهم، تماما كما اطلب من اللي اصابتهم الهيستريا. الجماعات المحددة في عالمنا العربي ومعروفة. وحتى لو أيدنا صوابعنا شمع لهم همه همه، مش حيتغيروا ولا قيمة لهم. لكن ايه الربط بين ما يقوله راديو موسكو والتحرك بالضبط زي فض الاشتباك الثاني. فض الاشتباك الثانى، السادات باع القضية، السادات حل منفرد، وكلمة حل منفرد، وقلتها للأسد، دي مستوردة من موسكو، وكان معاية غروميكو في القناطر، وبيقول ليه وساعة كاملة. قلت له انتم اللي دخلتوا هذه الكلمة الى المنطقة. وأنا بارفض اسمعها منك، وقلت حل منفرد ليه؟ لمجرد الوقيعة بيننا. ايه اللي بيربط هذا الخط؟ موسكو. همه الجبهة اللي عاملين النهارده عتاولة ووطنيين جدا، وعرب جدا، على حساب الام نسائنا في القدس. وفي الأرض المحتلة ازواجهم وأبناؤهم. خط واحد. الاتحاد السوفياتي هو الحريص على القضية القومية العربية وراديو موسكو بيقول: السادات باع. على طول وراه، ينطلقوا دول. حاجة غريبة يعني احنا بنفكر، ما احناش فاقدين عقولنا ابدا. كل هذه للأسف امور، كنت اتمنى بعد معركة اكتوبر [تشرين الأول] وبعد جيل اكتوبر [تشرين الأول] ان لا تحدث. العالم احترمنا بعد معركة اكتوبر [تشرين الأول] زي ما بقول لكم. حتى الذين حاربناهم، وأنزلنا بهم أكبر خسائر عرفوها خلال ثلاثين سنة هنا يشهدون اليوم للقوات المسلحة المصرية لحسني مبارك، للجمصي، ويتكلموا بمنتهى الاحترام، وعرفوا من هم العرب.

          كنت اتمنى أن لا يكون هذا هو أسلوب اخوتنا العرب في هذا الوضع الذي وصلنا اليه. هل لأن مئات الملايين في اوروبا واميركا واستراليا والعالم كله كانت ستتبع وأنفاسها محبوسة طوال زيارتي من قبلها وأثناء الزيارة ومن بعدها. هل هوه ده اللي تاعبهم؟ ايه انا مش عارف ايه. الحقوق الفلسطينية ما اتقالت امام الكنيست والشعب الإسرائيلي، ولأول مرة اواجهه في داره، وفي عقر داره، وبمنتهى الصراحة، والقدس العربية، وحقوق الشعب الفلسطيني وقيام دولتهم.

          سواء كان أمام الكنيست او في المؤتمرات الصحفية المختلفة اللي قعدنا فيها مع رئيس وزراء اسرائيل، أمام جميع صحفيي العالم. أمر مؤسف لأنه لا زال عند البعض في العالم العربي اسلوب المهاترات والسخافة والصبيانية.

<12>