(تابع) خطاب الرئيس محمد أنور السادات، بمناسبة عيد العمال، بشبرا الخيمة، 2 مايو 1978
المصدر: "مجموعة خطب وأحاديث الرئيس محمد أنور السادات، في الفترة من يناير إلى يونيه 1978، الهيئة العامة للاستعلامات، ص 395 - 424"

          طب فين القوانين الأساسية؟ قانون الضرائب اللى بأقول انه ده يشكل عامودا من الأعمدة اللي بيقوم عليها النظام ليه لان ده بيوزع الأعباء على الكل، القادر لازم يتحمل واللى دخله محدود مش بس ما يتحملش لا نعفيه كمان في سبيل ان القادر بيتحمل وبتتوزع علينا الأعباء بالتساوى قانون الضرائب قالوا دورتين، دورتين - ولسه مفروض انه يوافق عليه الدورة دى أرجو هذه لأنه ها يبقى الحساب عسير أمام الشعب كله.

          أنا بدى أقول كلمة لإخواننا فى مجلس الشعب: المظهر الأخير للمجلس في أربع حوادث متتالية أمر مؤسف يخرج عن كل تقاليد وقيم ومعانى العيلة المصرية - العيلة المصرية مش بتاعت السباب ولا الشتم ولا انفلات الأعصاب ولا التعطيل ولا المناورات البغيضة اللى الفقاقيع بيعملوها قال علشان يرجعوا للقوة تانى لأنه ممكن فى غفلة من الزمان كلنا نقول أه والله دا الدنيا راحت وبتاع يقوم ييجوا هما مناورات بتتم وهما سامعين جميعا وأنا عارف تشكيك كل مسئول تشكيك كل وزير تعطيل العمل الأساسي مجلس الشعب عمل له عمليتين: الرقابة والتشريع. وبعدين دول ممثلين الشعب على أعلى مستوى فى التمثيل المباشر وزى ما سمعتم بشهادة حتى المعارضين لم تحدث انتخابات مثل هذه التى جرت باعترافهم كلهم طب ايه اللى جد يعني لا متاهات وقانون زى قانون الضرائب الأساسي واللى بتقوم عليه العدالة الاجتماعية لأنه انا فى اعادة التوزيع بمناسبة اختلال الدخول علشان سياسة الانفتاح، حصل اختلال فى الدخول طيب علشان أعيد هذا الاختلال الى التوازن يا اما ابتدى أعمل حراسة يا أصادر يا أأمم وانتوا عارفين أنا مش بتاع الكلام ده اذن بالقانون بسيادة القانون يعاد توزيع الاعباء بحيث يتحمل كل واحد ما عليه حسب قدرته وبحيث تتحمل الدخول الطفيلية أو الدخول اللى كبرت نتيجة الانفتاح تتحمل مسئوليتها أو يقدم إلى المحاكمة لأن دى جريمة فى حق الشعب.

          وأنا عايز أأمن زى ما قلت لكم كل مصرى ومصرية على أرض مصر ان شاء الله في أقصى تجمع فى الصحراء لازم أأمن كل مصرى ومصرية على حياته وعلى مرضه وعلى شيخوخته وعجزه وموته، دا أساس النظام

<21>