(تابع) خطاب الرئيس أنور السادات في افتتاح الدورة الخامسة للمؤتمر القومي للاتحاد الاشتراكي العربي

به انتهزوا هذه الفرصة علشان يتكلموا همه، بس ما حدش يتكلم ولا يرد عليهم. ورحنا الأمم المتحدة، وراح وزير خارجيتنا هناك ودخل معركة من أروع المعارك السياسية اللي حصلت. قاومت أمريكا بكل قواها وبكل نفوذها، وبكل ضغوطها، وبكل أسلحتها اللي بتستعملها للضغط والرشاوى والإغراء والتهديد. وحاولت إفشال عرض القضية على الأمم المتحدة فلم تنجح. بل بالعكس لما لقت نفسها في الآخر في وضع الهزيمة كانت مقدمة قرار سحبته علشان ما تتعرضش أمام العالم لهزيمة قرارها لأول مرة في الأمم المتحدة. قرار تتقدم به الولايات المتحدة، ونجح القرار الأسيوي الأفريقي اللي عبارة عن قرار تقدمت 16 دولة أفريقية وأسيوية وعليه تعديل فرنسي.

         كانت أول مرة تشوف فيها أمريكا المجتمع الدولي كله ما بيستجبش لا لضغوطها، ولا للتهديد، ولا للوعيد، ولا للإغراء، ولا للرشوة اللي بتلجأ إليها في مثل هذه المواقف. قولنا قرار الجمعية العامة للأمم المتحدة، بشرط أن يتقدم الأمين العام في ظرف شهرين بتقرير للأمم المتحدة يسجل فيه مدى تقدم القضية، وبشرط آخر هو إننا لن نمد وقف إطلاق النار مرة أخرى. الهدف من مد فترة وقف إطلاق النار إن أمريكا وإسرائيل عايزنها تبقى عملية دورية، كل 90 يوم أتوماتيكي تتجدد لوحدها وتقعد إسرائيل على الضفة الشرقية. وإذا كنا عايزين نتفق نروح نمضي، مش عايزين نتفق أهي قاعدة في الضفة الشرقية. ده هدفهم ومخططهم. لكن لن نسمح بهذا، وعلشان هذا قلنا أن لن نقبل مد فترة وقف إطلاق النار مرة أخرى إلا إذا كان في الموقف شيء وصلنا إليه ووصل يارنج إلى مرحلة من المراحل تدعونا إن إحنا نقعد هنا ونتكلم تاني ونفكر تاني. لكن لن يكون هذا أبدا بصفة أتوماتيكية، ولن يتكرر مد وقف إطلاق النار لمجرد كلام، أو لمجرد حركات سياسية إحنا جميعا نفهمها، وإحنا جميعا كشفنها من زمان.

         أذاعوا لما جه وقف إطلاق النار وقبلناه، أذاعت إسرائيل إنها استفادت من وقف إطلاق النار، والشيء الغريب واللي قلته لريتشارد سون برضه، إن إسرائيل بتعلن وبتقول إن إحنا عملنا خط ماجينوه، إسرائيل أعلنت فعلا وقالت إن إحنا عملنا على القناة خط زي الشىء ماجينوه بتاع فرنسا زمان، قلت له الشيء الغريب إن إسرائيل بتقول وبتعلن على لسان ضباطها والمسئولين فيها إنها بتبني خط وإنها بتستغل فترة وقف إطلاق النار ومحدش أبدا بيقول حاجة على هذا الكلام، وأمريكا مبتحركش ساكن لهذا الكلام.

         وإحنا علشان صواريخ دخلت قبل وقف إطلاق النار، طيب هو مين اللي سقط التلتاشر طيارة فانتوم واثنين سكاي هوك في عشر تيام؟ ما هي الصواريخ اللي هي جوه في منطقة القناة من قبل وقف إطلاق النار. هي الطيارات وقعت بعد إطلاق النار واللا قبل إطلاق النار؟ ما وقعت قبل إطلاق النار بالصواريخ اللي كانت موجودة جوه.

         إسرائيل بتعلن إنها استفادت من فترة وقف إطلاق النار.

<9>