(تابع) خطاب الرئيس أنور السادات، في عيد العمال، 1 / 5 / 1975
المصدر: "قال الرئيس السادات، الجزء الخامس 1975، السكرتارية الصحفية لرئيس الجمهورية، ط 1982، ص 114 - 121"  

وشاكر للاتحاد السوفيتى هذا بس لازم يتمم جميله ومسألة الدين وفترة السماح، ودى عملية فى العالم كله معترف بها لأنه احنا كلنا عايشين المصاعب وكلنا عارفين الظررف اللى بنواجهها ايه واحنا ما بنتخلاش عن التزامنا ما بنقولش احنا ما عليناش دين لا احنا علينا الدين وناويين نسدده لكن على الطرف الآخر أن يقدر ظروفنا. من الناحية الأخرى أمريكا فى السنة الماضية دفعوا معونة 250 مليون دولار اتخصم منهم الجزء اللى طهروا به القناة لأنهم طهروها بالأسطول بتاعهم اللى اشترك فى التطهير فيها اشترك مجانا زيه زى بقية الدول اللى اشتركت كلها.

          أنا باتكلم الآن مع الرئيس فورد .. وجت بعد فشل مهمة كيسنجر لحظة رهيبة جدا العالم كله كان قاعد مترقب فيها .. هو لو بنأخذ بقى على أسلوب الانفعال كان لازم بعد فشل مهمة كيسنجر نبتدى نشتم فى أمريكا ونقفل قناة السويس و.. و.. بس ده كله حيوصلنا لايه مش عارف بالتحليل الدقيق الهادى اللى الواحد بيكتم بيه كل انفعال وكل غضب الا شئ واحد بس اسمه مصر .. مصر بيحطها الانسان قدامه..

تحديد موقف أمريكا

          ليس من مصلحتنا أن نعادى حد من الكبار الاثنين. لا الاتحاد السوفيتى.. ولا أمريكا وأمريكا بكل صراحة في هذه القضية إذا شاءت فى أيديها أغلب خيوط هذه القضية لأنها هى اللى بتمد اسرائيل بالعيش والزبدة وبالمدفع إذا شاءت.. ولكن كلكم عارفين كيف تمارس اسرائيل الضغوط.. ولكن أنا لازم باعادة التقييم اللى بتقوم بيه الحكومة الأمريكية.

          من هنا من أسيوط ومن منبر عمال مصر بأقول للولايات المتحدة انه آن الأوان أن الولايات المتحدة تحدد موقف أمريكى محدد من اسرائيل فى القضية اللى احنا بصددها.. احنا رايحين جنيف لكن عايزين الموقف الأمريكى يكون واضح أبيض واسود.. هل أمريكا بتحمى اسرائيلى داخل حدودها.. أو أمريكا بتدافع عن اسرائيل فى الأرض اللى اغتصبتها واحتلتها من الغير.. كل ده لازم يكون واضح فى إعادة تقييم السياسة الأمريكية..

          من ناحيتنا احنا محتفظين بأحسن علاقات ممكنة مع أمريكا زى ما بنحتفظ بأحسن علاقات مع الاتحاد السوفيتى.

          وبالنسبة لقناة السويس. أنا بين أمرين اما أن تظل القناة مغلقة وأما انى أفتح القناة .. بالحساب الدقيق مصلحة مصر فين .. شفنا انى أما اتخذت أنا القرار بفتح القناة استجابت أمريكا مباشرة.. استجابت فرنسا والرئيس الفرنسى.. استجاب غرب أوروبا كله استجاب الاتحاد السوفيتى.. استجابت الدول الأفريقية والآسيوية استجاب العالم كله لقرارنا وقدروه كقرار حكيم على مستوى المسئولية العالمية.. كسبنا ما خسرناش وفوق هذا بنأخذ العائدات اللى تجينا من القناة ان شاء الله.

          زى ما كنت باحكى بالنسبة لنا ابتدينا الخطة الانتقالية بتاعتنا .. بنعيد البناء في المرافق .. بنعيد بناء مدن القناة .. ورجع 600 ألف مهجر إلى بيوتهم والى مدنهم وإلى شوارعهم والى أحيائهم واشتغلت الطاقات العاطلة .. بنفتح المناطق الحرة الجديدة بننفتح على العالم كله.. ولكن زى ما قلت فى خطابى الأخير لا زالت حالة الغلاء فى العالم وضغط التضخم بيأثر فى نواحى كثيرة..

لا أسمح بالتخريب

          أنا عايز أقول لكم بمنتهى الصراحة وانتم العمال اللى قامت على أكتافهم الصناعة.. وقام على اكتافكم وحيقوم كل بناء جديد  لمصر..

          أنا عايز أقول انه لما تكون عندنا مصاعب ما يجبش نسمح لحد فى وسطنا انه يستغل هذه المصاعب ولازم نوقفه عند حده من داخلنا.

          يعنى أضرب لكم مثل بسيط بتشكى الدولة كلها من أزمة المواصلات طيب فى أول يناير ألاقى متظاهرين طلعوا وكسروا 40 أتوبيس ..

          والأتوبيسات دى ملك مين؟ ملككم ملك الشعب مش ملك شركة فلان الفلانى واللا امتياز بتاع فلان الفلانى دا ملك الشعب ليه التخريب ليه.. وأسلوب الهدم ليه.. وأسلوب الحقد ليه .. علشان كده باقول لكم وانتم اللى قامت وحتقوم على أكتافكم بأطالبكم أنتم انه أمثال هذه العناصر انتم اللى بتتعاملوا معاها وتوقفوها عند حدها لأنى بأثق فيكم ثقة كاملة والا ماكنتش جيت وقفت معاكم علشان أقول لكم كل سنة وانتم طيبين.

          النهارده المطالب.. كل طائفة وكل انسان له مطالب وكل واحد عايز يحسن حالته. وأنا معترف معاكم ان احنا بنمر بأوقات صعبة خصوصا على محدودين الدخل اللى دخولهم صغيرة.. وده اللى أنا جاى له دلوقت.

          لازم أنبهكم وأقول لكم يا عمال مصر ويا أبنائها. وأقول لمصر كلها من خلالكم أنتم أنا ابتداء من اليوم لا أسمح ابدا لا بالتخريب ولا بتعطيل الانتاج.. الأخطاء ممكن تقع ونصلحها. لكن التخريب غلط وتعطيل الانتاج غلط لأنه احنا بنقلل من انتاج مصر.. واحنا فى الانفتاح.. أنا فى الانفتاح باقول وقلت لوزير الاقتصاد لما شفته مع رئيس الوزراء. قلت له كل ما يضيف إلى مصر انتاج جديد وعمالة جديدة عمال بتشتغل.. أنا با أقبله على طول.. وما نقعدش نقول قطاع خاص وقطاع عام والكلام ده كله.

          كل ما يضيف انتاج ويضيف عمالة أنا باقبله على طول.. وباتعاون معاه وباديله الفرصة. وانا مش ضد ان أى واحد يكسب بعرقه وبانتاجه لكن مش بالسمسرة.. بالسمسرة لازم يتحاسب ويدفع عليها غالى .. اما بعرقه يكسب ويدى حق الدولة ويعيش ويحسن نفسه زى ما هو عايز.

          علشان كده أنا حبيت أقول لكم لا التخريب ولا تعطيل الانتاج أسمح به بعد اليوم أبدا.. أنا قلت أول كلمة فى خطبتى.. أذكرها.. الحقد لا يبنى أبدا.. بالحب بالأخوة بالفهم نقدر نبنى ونحل كل مشاكلنا ان شاء الله..

<6>